Que fideliter aguntur feliciter litteris commendantur, actu namque componuntur, litteris eternantur : inde est, quod ego Alvredus dictus abbas Britulii, et Berengarius prior Montisdesiderii, litteris notum fieri volumus tam futuris quam presentibus, quod ecclesia Brituliensis perpetuo et jure hereditario possidendum recepit ab ecclesia beate Marie Montisdesiderii, quidquid dicta ecclesia Montisdesiderii habebat in villa de Haubervillari, et in toto territorio ejusdem ville, pro pensione X solidorum parisiensium annuatim et censualiter in festo Sancti Remigii solvendorum : hoc uterque concessimus et utriusque ecclesie Brituliensis videlicet Montisdesideriensis capitulo concorditer assentiente statuimus, ut ne alicujus improbitate ab ista resiliatur compositione, presenti chirographo fecimus annotari et sigillorum nostrorum auctoritate corroborari. Testes etiamque affuerunt subnotati. Britulienses : Hugo, prior. Petrus, subprior. Manasses de Cepeio. Torestanus, eleemosinarius. Symon, thesaurarius. Montisdesiderienses : Henricus. Symon. Ingelrannus. Franco. Datum Britulis, anno ab incarnatione Domini M.C.LXXXXIIII, per manum Symonis.