Philippus, Dei gratia Francorum rex, universis presentes litteras inspecturis, notum facimus, quod cum verteretur quæstio in curia nostra inter maiorem et juratos Montisdesiderii actores ex una parte ; et homines seu communitatem ville de Boisteaux reos ex altera, super eo quod ipsi Maior et jurati asserebant quod prædicti homines de Boisteaux se gerunt et tenent injuste esse quietos, liberos et immunes a præstatione pedagii per pedagium Montisdesiderii seu metas ipsius pedagii cum rebus suis quas emunt infra dictas metas et extra transeundo ; dictis hominibus de Boisteaux in contrarium asserentibus et dicentibus quod tanto tempore perdictum pedagium seu metas ipsius quiete et libere transierunt, quod jus, immunitas seu libertas non solvendum est sibi acquisitum ; tandem fada inquesta super his, de mandato nostro, ac visa et diligenter inspecta, pronuntiatum est per curiam nostram judicium ; dictos homines de Boiteaux de rebus quas emunt ad usus suos, et de suis nutrimentis, et de fructibus qui crescunt in suis hereditatibus seu garguagiis, a præstatione pedagii liberos et immunes debere remanere, et quod predictas res sic emptas possunt per metas dicti pedagii quiete et libere ducere et portare. De rebus quas emunt sive vendunt causa mercaturæ dictos homines de Boiteaux ad solvendum pedagium per idem judicium condemnando, in cujus rei testimonium præsentibus litteris nostrum fecimus apponi sigillum. Actum Parisiis anno Domini millesimo ducentesimo quarto mense junii.