Philippe duc de Bourgongne conte de Flandres d'Artois et de Bourgoingne palatin seigneur de Salins et de Malines a tous ceulx qui ces presentes lettres verront salut. Comme feu notre redoubté seigneur et frère Henry roy d'Angleterre derrain trespassé que Dieux absoille nous eust par ses lettres patentes donne au chastel de Rouen le vint cinquiesme jour de decembre ou VIIe an de son regne et pour certaines consideracions contenues esdictes lettres promis et accordé que il donroit et feroit ayde et diligence effectuelle que par feu monseigneur le roy Charles dont Dieu vueille avoir lame nous seroient assignées accordées et baillées sans dismembracion ou diminution de la couronne de France terres possessions et seigneuries empres les terres possessions et seigneuries que nous avons et tenons ou royaume de France jusques à la vraye valeur annuelle de vint mil livres parisis a demourer à nous et a feu notre tres chiere et tres aimée compaigne la Duchesse cui Dieu pardoine lors vivant a toute la vie de nous et de chacun de nous et des hoirs masles procréés du mariage de nous et delle à tenir du roy et couronne de France selon la manière et coustume du royaume de France et s'il avenoit que feu mondit seigneur le roy ne nous feist les dictes assignacion concession et bail icelluy feu roy Henry si tost qu'il venroit à la dignité royal de France les feroit par la maniere dessus exprimée et permettroit nous et notre dite compaigne et les hoirs de nous et d'elle dessus diz joir et user sans empeschement ou contradiction de lui ou de ses hoirs et il soit ainsi qu'il ait pleu à mon très redoubté seigneur monseigneur Henry roy de France et d'Angleterre son filz pour l'advis et deliberacion de notre tres chier et tres ami frère Jehan regent le royaume de France duc de Bedfford et des gens de son grant conseil, nous presentement baillier ceder et transporter pour les dictes assignacion concession et bail les villes chasteaulx et chastellenies de Peronne Montdidier et Roye et les villes cité et baillyage de Tournay Tournesis Saint-Amand et Mortaigne avec trois mil livres tournois sur la recepte des aydes à Amiens ainsi que par les lettres de mondit seigneur peut apparoir desquelles la teneur est telle :

Henry par la grace de Dieu roy de France et d'Angleterre à tous ceulx qui ces presentes lettres verront salut. Savoir faisons que comme notre très cher seigneur et père que Dieux absoille pour contemplacion de la personne de notre très chière et très aimée tante Michelle compaigne de notre très chier et très aimé oncle Philippe duc de Bourgoingne comte de Flandres d'Artois et de Bourgoingue et pour la consideracion de la grant et bonne affection que notre dit oncle avoit au bien de la paix final des royaumes de France et d'Angleterre à l'occasion aussy des grans charges despenses et labeurs que notre dit oncle avoit supporté et supporteroit pour le bien d'icelle paix et pour autres causes et raisons à ce le mouvans eust entre autres choses concédé et promis à notre dit oncle de faire et mettre toute diligence effectuelle à ce que par notre très chier seigneur et ayeul le roy Charles derrain trespassé cui Dieu pardoine feussent à notre dit oncle assignez, concedez et baillez sans desmembrement ou diminution de la couronne de France terres possessions et seigneuries que notre dit oncle a et tient en notre royaume de France jusques à la vraye valeur de vint mil livres parisis par an pour lui et notre dite tante sa compaigne à la vie deulx et d'un chacun d'eulx et de leurs hoirs masles procreez deulx deux a tenir en fief ycelles terres possessions et seigneuries du roy et de la couronne de France selon la maniere et coustume du royaume de France et s'il avenoit que notre dit seigneur et ayeul ne feist les assignacion concession et bail dessus ditz notre dit seigneur et père promist de les faire sy tost qu'il seroit venu à la dite couronne de France sans empeschement ou contradiction de lui et de ses hoirs comme ces choses et autres sont plus à plain contenues et declairiées es lettres de notre dit seigneur et père sur ce faictes données en notre ville de Rouen le XXVe jour de décembre ou VIIe an de son règne et scellées de son scel desquelles il nous est deuement et souffisamment apparu et pour ce que les dictes assignacion et bail nont pas esté faiz a notre oncle de la dicte somme de vingt mil livres parisis, nous qui de tout notre cuer desirons et voulons loyaument enteriner et accomplir ce que par notre dit feu seigneur et pere a esté promis à notre dit oncle comme raison est à ycellui par ladviz et deliberacion de notre très chier oncle Jehan regent notre royaume de France duc de Bedfford et des gens de notre grant conseil pour ce assemblez en grant et notable nombre avons pour satisffaire notre dit oncle Philippe de la dicte somme de vint mille livres parisis qui montent à la somme de vint cinq mil livres tournois. Donné cédé transporté et délaissée et par ses présentes donnons transportons et delaissons les villes chasteaulx et chastellenies de Peronne Roye et Mondidier avec toutes leurs appartenances et deppendances pour d'icelles villes chasteaulx et chastellenies ensemble de tous les droits fruiz prouffez rentes revenues seigneuries patronage collacions de benefices et autres droiz et émolumens quelzconques que avons et povons avoir tant en demaine aydes comme confisquacions et forfaitures quelzconques comme autrement joir et user plainement et paisiblement comme de sa propre chose seulement sa vie durant et avec ce lui avons donné, cedé, transporté et delaissié donnons cedons transportons et delaissons les villes cité et bailliage de Tournay Tournesis Saint Amand et Mortaigne avec toutes les appartenances et deppendences quelzconques sauf toutevoyes le douaire que prent sur la dicte ville de Mortaigne notre très chière et très aimée tante la duchesse de Hollande jadiz femme de feu notre oncle le dauphin de Vyennois et duc de Berry et avec ce lui avons assigné et assignons la somme de trois mil livres tournois par chacun an sur la recepte des aydes es villes cité et diocèse d'Amiens pour oir et user par notre dit oncle Philippe des villes cité et bailliage de Tournay Tournesiz Saint Amand et Mortaigne et somme de trois mil livres tournois dessus diz sa vie durant comme dit est auquel notre oncle Phelippe avons donné et donnons par ces mesmes présentes plain povoir auctorité et mandement spécial de mettre et instituer es lieux à lui transportez et delaissiez baillys prevosts capitaines receveurs et grenetiers contreleurs et autres officiers necessaires telz que bon lui semblera pour le bien de justice et à son prouffit singulier et à la seureté et entretenement des villes citez bailliages chasteaulx et chastellenies des diz Peronne Roy Montdidier Tournay Tournesiz Saint Amand et Mortaigne dessus diz en ostant et deschargeant tous autres selon son bon plaisir pourveu que notre dit oncle payera ou fera payer les charges deues et accoustumées d'ancienneté. Toutevoyes nous avons reservé reservons par ces dites présentes par devers nous et notre court de parlement la souveraineté et ressort de toutes les villes cité bailliages chasteaulx chastellenies et lieux dessus diz ensemble la seigneurie emolument et prouffit de la maniere dudit Tournay et voulons que après le trespas de notre dit oncle Phelippe toutes les villes cité bailliage chasteaulx chastellenies et toutes autres choses nessus dictes ensemble les diz trois mil livres tournois que lui assignons sur la dicte recepte à Amiens retournent et reviennent es mains prouffit et demaine de nous et de nos hoirs.

« Sy donnons en mandement à nos amez et feaulx conseilliers les gens de nos comptes tresoriers à Paris et generaulx gouverneurs de toutes nos finances aux bailliz de Tournay et de Tournesiz de Vermendois et d'Amiens nos procureurs et receveurs illec et à tous noz autres justiciers officiers et subgiez ou à leurs lieuxtenans présens et à venir et à chacun d'eulx si comme il appartiendra que notre dit oncle Phelippe ou ses commis et deputez pour lui facent sueffrent et laissent joir et user plainement et paisiblement de noz don cession transport et delaissement dessus diz sans lui mettre ne souffrir estre mis sa vie durant aucun empeschement ou destourbier au contraire. Parmi ce toutevoyes que nos diz receveurs de Tournay et de Tournesiz Vermendois et Amiens seront tenus chacun en drois soy faire mencion en leurs comptes chacun an des don, cession transport et delaissement dessus diz pour la conservacion de notre droit et demaine. En tesmoing de ce nous avons fait mettre notre scel à ces presentes. Donné à Paris le VIIIe jour de septembre l'an de grace mil CCCC vint et trois de notre regne le premier. »

Savoir faisons que nous eue consideracion aux grans charges et affaires que mon dit seigneur a eu et a pour le present pour le fait de sa guerre et autrement avons les dites assignacion concession et bail pour les dictes vint mil livres parisis de rente annuelle ensemble tout le contenu es lettres de mon dit seigneur dessus transcriptes agreables nous en tenons pour contens et en quittons mon dit seigneur le roy et tous les siens sans jamais dire ne venir au contraire en quelque maniere que ce soit par ainsi toutevoies que sil avenait que les aides neussent cours au dit lieu d'Amiens que les diz trois mil livres tournois nous feussent assignez bien et convenablement autre part. En tesmoing de ce nous avons fait mettre notre scel secret en l'absence du grant à ces presentes.

Donné à Paris le IXe jour de septembre l'an de grace mil quatre cens vint et trois.