Philippe de Bourgogne, conte de Charolois, seigneur de Chasteaubelin lieutenant et ayant en absence et par l'ordonnance de mon tres redoubté seigneur et pere monseigr le duc de Bourgogne, conte de Flandres, d'Artois et Bourgogne, le gouvernement de sesdiz pays et contez de Flandres et d'Artois, à noz très chers et bien amez maistre David Bousse conseiller et maistre des comptes de mondit seigneur et père à Lille et Jean Roubaut, receveur d'Arras, salut et dilection. Comme il ait nagaires pieu à Monseigr le Roy, donner, ceder, transporter et delaissier à nous et à nostre tres chiere et très amée compaigne la contesse sa fille les villes, chasteaulx et chastellenies de Peronne, Montdidier et Roye, avec les prevostez, ressors, enclavemens, appartenances et appendantes d'iceulx lieulx, pour en joyr en tous prouffiz, rentes, revenues, drois et émolumens quelsconques, tant et si longuement et jusques ad ce que aurons esté payés et contentez a une fois de la somme de cent mil escuz qui nous sont deux de reste, à cause des deniers du mariage de nostre dite compaigne, avec des joyaulx, estoiremens et habillemens qui lui furent promis bailler par mondit sgr le Roy, au traictié dudit mariage comme tout ce appert plus clerement par ses lettres patentes sur ce faites, par vertu desquelles nous ayons prins et fait prendre la possession et saisine reelle et corporelle des dites villes, chasteaulx et chastellenies comme en tel cas appartient et est accoustumé, et il soit ainsi que pour savoir et enquérir l'estat et valoir des droitz, proffiz, rentes et revenues d'iceulx lieux, nous soit besoing d'y envoyer personnes notables qui diligemment se y emploient et facent leur devoir savoir vous faisons que nous confianz a plain de voz sens, discrecion, loyaulté et bonne diligence.

Vous mandons et commettons par ces presentes que vous vous transportez en noz dites villes, chasteaulx et chastellenies.

Et illec appelez avec vous noz gouverneurs, bailli et receveur general desdiz lieux, se bon vous semble et toutes les fois que le besoing sera, et tous autres qui pour ce seront appelles.

Vous veez, visitez et examinez dilegemment par les comptes, registres et papiers des receptes et mises d'iceulx lieux tout l'estat des rentes et revenues, tant de domaine des exploiz de justice d'aides comme d'autres choses quelsconques.

Aussi des charges ordinaires et acoustumées de y estre paiées pour fiefs, aumoisnes, gaiges d'offices et autrement.

Et avec ce vous informez bien et diligemment des heritaiges, possessions et autres biens qui nous y sont avenuz et escheuz a tiltre de confiscation, de morte-mains, espaves, avoirs, estrahiers et autrement.

Et y ceulx faites saisir et mettre en nostre main et pardessoubs y celle, le gouverner ou les exposer et mettre en rente et les bailler et delivrer au plus offrant et dernier rencherisseur et eux leur promettera garandir comme en tel cas appartient.

Et sur ce leur faites bailler telles lettres qui seront necessaires.

Pour les deniers qui en verront et y seront estre employez et convertiz a nostre proffit,

Voulons aussi que vous vous informez de l'estat et gouvernement de tous les offices desdites noz villes, chasteaulx et chastellenies tant au regard de la justice, de recepte, comme autrement :

Et ce trouvez aucuns avoir mesusé en leur diz offices, leur suspendez l'aministration et exercice diceulx en y commettant autres jusques ad ce que par nous y sera autrement pourveu et ordonné.

De veoir aussi et visiter nos chasteaulx, maisons, molins, fours, granges, censes et autres possessions et heritages que avons et povons avoir en noz dites villes et chastellenies.

Et d'icelles places nous rapporter l'estat, affin que se aucunes reparacions ou emparemens y sont necessaires de les y faire faire.

Pour lesquelles choses et toutes autres faire et accomplir et ad ce constraindre tous ceux qui seront à contraindre. Nous vous donnons plain povoir, auctorité et mandement special ; mandons et commandons a tous nos justiciers, officiers et subgés, requerons tous autres qu'il appartendra que a vous et a vos deputez en ce faisant, obeissent et entendent deligemment et vous prestent et baillent conseil, confort et ayde, se mestier en avez et requiz en sont. Donné à Arras le XXVIe jour de septembre l'an de grace mil CCCC et dix huit.