A tous chiaux qui ches presente lettres verront et oiront, Fremins de Cokerel bailly de Vermandois salut. Sachent tout que par devant maistre Jehan Michenin de Montdidier garde du seel de le baillie de Vermandois establis en nostre lieu de par le roy pour oir les convenenches faites en le prevosté de Montdidier, vint et fu en se propre personne, Thomas dis li Grans du Castel, jadis fix Oudart li Grand de Montdidier, et reconnut que pour son communt pourfit apparissant si quant il dit, il a exangié bien et loialment par loyal exange perpetuellement et à tousjours et par permutacion d'exange à Willaume de Noiers de Montdidier, son neveu, jadis fil de Gillon de Noiers au pourfit de luy et de ses hoirs.

C'est à savoir tout le droit et l'action entierement qu'il avoit et dooit avoir, demander et reclamer en le maison de le porte du Castel de Montdidier joignant à le sale le roy et toutes les appendenches devant et derriere lequel on tient du roy no seigneur, meesmemant toutes les rentes, les debites, les frankisses et especialement toutes les choses entierement quel conques elles soient ou puissent estre sans rien excepter ne retenir qui pucent et doivent appartenir à le dite maison et frankisse si comme en plusieurs choses chi après devisées.

Premiers le frankisse de deux vakes et d'un veel que li dis Thomas pooit et devoit avoir ou bos de Mondidier puiske li bos seroit entrés en l'aage de chieunc ans dusques au temps et à l’eure que on feroit couper ledit bos.

Item si denier et deux capous de chens ou Noel seans seur le maison qui fut le sauvage, le seigneurie, le fuers, les forages et le tonnelieu.

Item sis sous et quatre deniers par an à le saint Remy seur le tonnelieu des porees, seur fuiziaus, cuillers et despotiers et le droit l'ostellerie.

Item seur le maison qui fu Robert Foucart quatre deniers et maaille a le saint Andrieu et un capon au Noel, et le seigneurie.

Item li hoir Raoul teroit deus deniers parisis et une pointevinne à le saint Andrieu et demi capon au Noël sur che meesme lieu.

Item l'ostelerie deus deniers et une poitevinne parisis a le saint Andrieu et demi capon au Noel de che meesme lieu.

Item le Maladerie autretant et de che meesme lieu et à ches meesme termes.

Item li hoir Jehan le Vielle un denier de che meesme lieu à le saint Remy.

Item sur le maison et le courtil qui fut Emedelinne Daterie douze deniers et une poulle à le saint Remy et trois sous à le saint Andrieu, et diset wit deniers et deus capons au Noel.

Item une fouée de bos quele que elle soit, soient fagos, bourrées, ou moiettes, se on le puet prendre de sen droit, et se on ne le prendroit, on a trois sous et sis deniers seur le prevoste de dens le vielle.

Item de toutes les carettes de bos qui passeront par dessous le porte du castel qui deschendront en l'abbeie ou non, une boize ou un fagot.

Item quatre paires de soullers de vake a moiaus la ou les vourra prendre à quatre estaus, hostés une paire des meilleures que le vendans peut hoster de l'estal, on prent les meilleurs après, et de chacune paire de soullers que on prent, on paie deus deniers parisis pour le facture tant seulement.

Item vint et un deniers à le Toussains que li roys droit, et especialement les choses chi après nommées qui li vainrent de ses anchisseurs si comme il dit ; s'il est à savoir :

Li sires du Cardonnoy ou si hoirs sept sous et sis deniers.

Item li sires du Plaissié Raoul le veel, ou si hoir chieunc sous tout a paier au jour de le feste Notre Dame en septembre ou lendemain.

Item messire Willaume de Sechelles et messire Renaus d'Aiencourt ou leur hoir sept sous sis deniers à le saint Remy.

Item messire Jehans du Bos ou si hoir quinze sous à le saint Remy.

Item messire Henris de Chessoy ou si hoir sept sous sis deniers à le saint Remy.

Item messire Gilles de Maisieres ou si hoir sept sous sis deniers à le saint Remy.

Item li hoir de le Tournele et le contesse de Retes ou leur hoir sept sous sis deniers à le saint Remy.

Le sires de Warsis (Waielles) ou si hoir sept sous si deniers à le saint Remy.

Item messire Drix de Remaugies ou si hoir sis sous et quatre deniers à mi-may.

Item li sires de Gratibus ou si hoir se sous sis deniers à mi may.

Item li Avones ou si hoir sept sous sis deniers à mi mars.

Li sires de Boullencourt sept sous sis deniers à mi mars.

Item li sires de Grivane ou hoir sept sous six deniers à mi mars.

Item messire Andrix de Liane ou si hoirs, dix sous à lendemain de le Toussains.

Item messire Mahix de Roye, sires de Garmeigni ou si hor chieunc sous à lendemain de Noel.

Item li hoir de Liane sept sous sis deniers à lendemain du Noel.

Item li hoir de saint Aubin sept sous sis deniers au Noel.

Item li moitié du tonelieu du pain.

Et toutes ches choses chi dessus escriptes en le fourme et en le menniere que elles sont dites et expressees, à, li dis Thoumas du Castel escangié bien et loialmant perpetuellement et à tans par permitacion d'escange et sans nule saute d'argent si comme il dit, audit Willaumes de Noiers son neveu, pour le maison qui fu Gillon de Noiers de Montdidier, pere jadis audit Willaume, qui sut en le rue as Feures de Montdidier ainsi comme s'estent et devant et deriere atenant à le maison Denise le Tavernier d'une part, et à le rue du Bourgeel d'autre. Item le terre du Val à cavé qui contient trois journix et douze vergues de terre ou environ. Item le terre de le croix Pinchet qui contient deux journix et demi de terre ou environ, en telle menniere que le dit Thoumas doit paier toutes les debites, teles comme le maison ou les deus pieches de terres doivent. Lequele maison et toutes les appartenanches, et les deus pieches de terre devant devisees li dis Thomas du Castel à clos et emportées dudit Willaume de Noyers son neveu, en recompensation de le maison de le porte du Castel, du droit et de le frankisse et des appartenanches que li dis Willaume à et terra il et si hoir. Desquise choses dessus dites lidis Thomas du Castel s'en tint plainement à bien paier, par devant ledit maistre Jeban.

Et toutes ches choses chi dessus escriptes en le menniere que elle sont devant divisees, lesquels li dis Thoumas à escangiés bien et loialement, perpetuellement et a tousjours audit Willaume de Noiers son neveu par permitacion d'escange sans nule saute d'argent si comme dit est par deseure, à li dis Thoumas du Castel creanté a tenir bien et loialement et a warandir quitemant et empaïs de lui et de ses hoirs ou devant dit Willaume de Noiers son neveu et a ses hoirs ou a chelui qui de lui aroit cause, ou au porteur de ches lettres contre tous et envers tous a tousjours seur l'amende du roy, et le painne de tenir son cors en le prison le roy serée, et avec che il est encore tenus de rendre tous les cens et les damages qui pourroient estre fait es choses dessus dites warandir et pourcachier, dont li porteurs de ches lettres seroit creus par sen simple sairement sans dire ne faire encontre.

Et n'est m'y a oublier que pour che que demoisele Marie de Courrcel femme du devant dit Thoumas aroit ou pourroit avoir douere au temps à venir en toutes les choses dessus dites lesquels le dis Thoumas du Castel ses maris a excangié audit Willaume de Noyers son neveu, par permutacion d'excange si comme dit est par deseure, elle de s'en bon gré et se bonne volente et sa contrainte nule de nului quicte et a quitié, renonche et a renonchié du pooir et de l'auctorité ledit Thoumas son mari, et lui tout present, a tout tel douaire de noches que elle porroit avoir demander et reclamer, par recompensation des quatre vint livres de Paris que elle en a eu et rechut dudit Thoumas sen mari ou rester de son douaire, dont elle s'est tenue pour bien paiée par devant le dit maistre Jehan et promist et créanta le dites demoiselle Marie par le foy, de sen cors baille en le main du dit maistre Jehan que contre cheste quitanche et ceste renonciation faite puis ore mais en avant n'ira ne aler ne fera par autruy ni appert ni en recoy, et ne travaillera ne fera travailler le dit Willaume nes hoirs, ne cheluy qui de le aroit cause ne le portair de ches lettres pour cause de don, d'aumosne, de vivre, d'aqueste, de douaire, ne d'iretage, anchois leur en laira goir et possesser paisiblement et a tousjours sans jamais de riens aler encontre. Et avec toutes ches choses ledit Thomas et demoiselle Marie se femme sont tenus de rendre tous les cous et les damages qui porroient estre faits eschoses dessus dites, warandir et pour cachier dont le porteur de ches letteres seront creus a son simple sairement, sans plus dire ne faire encontre.

Et quant à toutes ches choses dessus dites tenir, warder, warandir, quitier et renonchier fermement et loialment en le mennière qu'il et devant devisé, ont le dit Thoumas et demiselle Marie se femme obligiés ans, et tous leurs biens et les biens de leurs hoirs muebles et non muebles presens et avenir à prendre et a justichier par le cour le roy par tout sans nul meffait.

En tesmoing de che nous avons chez lettres seelées du scel de la baillie de Vermandois dont on use en la provosté de Mondidier, sauf le droit le roy et l'autruy. Che fut fait en l'an de grace mil trois chens et dis em mois decambre le vendredi prochain apres le feste Saint Nichaize.